Twin Tube Tunnel between Thane and Borivali

ठाणे ते बोरीवली दरम्यान दोन भयुारी मार्ग आणि बोगद्या जवळचा मार्ग व इतर नागरी बांधकामाची कामे करणे

सद्यस्थितीत ठाणे ते बोरिवली दरम्यान प्रवास करण्यासाठी प्रवाशांना प्रामुख्याने घोडबंदर मार्गाचा वापर करावा लागतो. या मार्गावर मोठ्या प्रमाणात वाहतूक कोंडी होत असल्याने प्रवासाचा कालावधी वाढुन मोठ्या प्रमाणावर प्रवाश्यांना मानसिक त्रास व इंधन अपव्यय होत आहे.

या समस्येवर उपाययोजना करण्यासाठी व ठाणे ते बोरीवली दरम्यान वाहतुक वेळेत कमी होण्याच्या उद्देशाने मुंबई महानगर प्रदेश विकास प्राधिकरणामार्फत (MMRDA) ठाणे व बोरीवली शहरे जोडण्याकरीता संजय गांधी राष्ट्रीय उद्यानाच्या खालुन दुहेरी बोगदा मार्गाचा प्रकल्प हाती घेण्यात आला आहे. या बोगद्यामुळे ठाणे व बोरिवली यांच्यात अखंडित आणि थेट रस्ते जोडणी उपलब्ध होणार असून, मुंबई महानगर प्रदेशातील प्रादेशिक दळणवळण व वाहतूक गतिशीलतेत लक्षणीय सुधारणा होण्यास मदत होणार आहे.

सद्यस्थितीत घोडबंदर मार्गे ठाणे ते बोरिवली हे सुमारे 23 कि.मी. अंतर पार करण्यासाठी अंदाजे 1 ते 1.5 तासांचा कालावधी लागतो. सदर प्रकल्प पूर्ण झाल्यानंतर हे अंतर केवळ 15 मिनिटांत पार करता येणार असून सुमारे 1 लाख नागरिकांना सुलभ व वेळेची बचत करणारा प्रवास उपलब्ध होणार आहे.

बोगद्याचा भाग संरक्षित वन क्षेत्रातून जात असल्याने, संजय गांधी राष्ट्रीय उद्यानावर कमीत कमी परिणाम होण्यासाठी अत्याधुनिक Tunnel Boring Machine (TBM) तंत्रज्ञानाद्वारे बोगदा खोदकाम करण्यात येत आहे. प्रत्येक बोगद्यात 1 आपत्कालीन मार्गिकेसहीत एकूण 3 मार्गिका उपलब्ध राहतील. दोन्ही बोगद्यांना सुरक्षेच्या दृष्टीकोनातून दर 300 मीटर अंतरावर क्रॉस पॅसेजद्वारे जोडण्यात येणार आहे. तसेच वायुवीजन प्रणाली, अग्निशमन यंत्रणा, धूर शोधक व प्रकाशयुक्त सूचना फलक प्रस्तावित आहेत. सदर प्रकल्पाचे भूमिपूजन मा. पंतप्रधान महोदय यांच्या शुभहस्ते दिनांक 13 जून 2024 रोजी करण्यात आले.

सदर प्रकल्पास प्राधिकरणाच्या दिनांक 10 मार्च 2023 रोजीच्या 154 व्या बैठकीत प्रशासकीय मान्यता देण्यात आली आहे. तसेच, प्राधिकरणाच्या दिनांक 04 मे 2023 रोजीच्या 275 व्या कार्यकारी समितीच्या बैठकीत मे. मेघा इंजिनिअरिंग अँड इन्फ्रास्ट्रक्चर लि. यांची कंत्राटदार म्हणून नियुक्ती करण्यात आली. सदर प्रकल्पाचे कामास दिनांक 19 मे 2023 रोजी सुरुवात झाली.

मे. हिल इंटरनॅशनल प्रोजेक्ट मॅनेजमेंट इंडिया प्रायव्हेट लिमिटेड - मे. टाटा कन्सल्टिंग इंजिनियर्स लिमिटेड (जेव्ही) या सल्लागारास दि.20 जून 2024 रोजी कार्यारंभ आदेश (Notice to Proceed) देण्यात आलेले आहेत.

शासनाने सदर प्रकल्पास दिनांक 14 ऑक्टोंबर 2024 रोजीच्या शासन निर्णयान्वये राज्य शासनाचे बिनव्याजी दुय्यम कर्ज सहाय्य देण्यास व इतर प्रकल्प अनुषंगिक बाबी जसे की, बाह्य कर्ज सहाय्य/इतर वित्तीय संस्थांमार्फत कर्ज उभारण्यासाठी मान्यता देण्यात आली आहे. तसेच सदर प्रकल्प “महत्त्वपूर्ण नागरी वाहतूक प्रकल्प” व “निकडीचा सार्वजनिक प्रकल्प” म्हणून घोषित करण्यात आला आहे.